孕媽心情日記

孕婦本身的情緒可以好複雜
未曾身在其中根本無法幻想
生活上可以發生好多唔開心野
就會好驚影響到BB
但呢份驚同擔心已經影響緊BB
大人當然可以承受一定程度的壓力
但無必要淼淼一同承受
都有覺得自己表現得好差
係一個好唔合格的媽咪
負能量又產生更負面效果

以往整個生活重點都放響工作
深信有手有腳，肯做肯捱點都唔會餓死
亦會有份不甘心覺得自己不止於此停步
想兩邊都做到最好
但你身體每日的變化告訴你
你要停，感覺好似被人縛手縛腳咁
開支大左，收入又少左，
你冇得向前，但又唔可以後退
好多煩心事好困惱

由全力職業打拼，瞬間變人妻加媽媽
心理上同生活上完全扭轉
之前可能會覺得係無選擇，要妥協
當真係諗通左既話，可以叫做放低
亦可能淼淼知呢個女人打拼左咁多年，做得咁辛苦
所以出現在我的生命中，
要我休息下，改變下
叫我成長，學習平衡生活

亦多得水生好似發仔瘟咁鍾意小朋友
如果唔係我係冇諗過要小朋友
就唔會有呢份咁特別的禮物
水生佢都成熟左好多
升呢愈來愈似一個稱職的水爸爸
共同建立一個健康，
一家三口一起成長的水家庭

黎緊3月打算安排好同埋打點好學校營運操作上既野之後，
除左已定的課堂外同工作外
暫不會接受新的工作安排
4月開始我要專心學習同享受做媽咪
我的學生們，伙伴們，9月再見



P.s D人又話生女係肚圓，生仔至係肚尖既？
點解淼淼咁尖架？
唔通佢同媽媽一樣，是個女漢子？