覺得孕照係一定要影，唔可以錯過
因為你唔會預你會生幾多胎，仲有冇機會影
我亦唔想到左若干年後
先睇到人地既靚靚孕相而自己後悔無影
見到都係有左BB既孕媽朋友都影左輯靚相
等到頸都長曬既我，終於都輪到我影啦！
認識攝影師connie已經好多年啦
以前睇住佢影model相果陣
已經非常欣賞同鍾意佢鏡頭下女性的獨特氣質和美感
及後知道佢有接孕照拍攝工作
我就決定如果有左BB，一定要搵佢影一輯靚靚孕照！！
當知道有左第3個幾月個胎穩定果陣，
已經即刻問定同約定connie啦
由於天生一副童顏樣
所以鎖定的mood都離不開要粉系，夢幻，少女既！
好多朋友都問我幾時影
D人原來好多都係7個半至8個半月左右先影既，
因為驚太早影未見肚無野睇
但我呢個7個月大之巨肚，個個見到都以為我就黎生得
咁即係可以早D影啦 XDDDDD
早影都有好多好處
一來而家個肚touchwood仲係白白滑滑零肚紋
二來D人話懷孕後期會更攰同更腫
三來個肚再大D個形可能會dum，就無而家個肚形咁靚架啦！
（其實除左dum同肚紋，我最怕突肚臍！好在無，肚皮算係唔會嚇親人！）
集合眾多因素，一於響第28周KO左呢個心願先～
作為一個都幾保守既女仔
鎖定左影孕照我係一定要有衫著既！
唔好話nude，淨係得塊布遮住重要部位果D我都唔得架>.<
其次，如果決定要打出個肚皮，
就一定要係女攝影師，
雖然個肚皮唔算咩性感部位，或者會引起咩幻想
但係........人地真係好保守架咋................
我成世人影過唯一一次水著，
下身都係要著平腳短褲既，仲要走到沙巴咁老遠影先接受到
呢次其實算係打破左我幾性感既尺度 (睇完覺得碎料都唔好車我wo～)
同埋多得本身對connie係超級信任，大家女仔又唔會懢介
所以影果陣都漸漸地很放得開
仲有好多謝connie作為一個女性
很理解和明白一個女生的需要
因為我自己覺得手臂很粗壯 (一拳可以打死老虎！)
所以我很怕穿露出手臂的衣服＠＠
connie都提供左很多有袖的靚衫給我
雖然可能有D男攝影師會配合地話可以執相既
但其實影果陣可以遮住最不自信的部位
拍攝時是很有安全感的，
亦減低左顧慮，唔使再驚要用pose遮遮掩掩！
今日個妝係自己化既
不過最能醫不自醫就係自己好難整個頭
多謝全能的connie仲要幫我捲頭髮
同埋無諗過下午影完晚上已經收到靚相
好幸福！好感動！！原來我都仲算係一名靚媽！
呢個星期水生都北上工作中
加上條友仔話影大肚相呢件事好無聊
(等同佢話要搵攝影師幫佢架車影相，我都覺得好無聊一樣)
所以呢輯相都咪鬼預佢
不過因為奉淼成婚，由始至終都無影過prewedding
影孕照呢個咁重要既時刻都想有張一家三口幸福溫馨照既
留待個肚再大D先預埋佢啦
不過都係要就我，影夢幻少女feel架wo,
水生咁姣應該唔成問題啦 wahahahahahaaaa
沒有留言:
張貼留言